हाडनाता करणीका फरार प्रतिवादी पक्राउ

मेयरसाप डेस्क

अत्तरिया । कैलाली र बैतडी जिल्लाका अदालतबाट विभिन्न मुद्दामा सजाय तोकिएका दुई जना फरार प्रतिवादीहरूलाई प्रहरीले पक्राउ गरेको छ ।

पक्राउ पर्नेमा सवारी ज्यान मुद्दाका फरार प्रतिवादी बैतडीको डिलासैनी गाउँपालिका–६, गोकेलेश्वरका ३७ वर्षीय सुरेन्द्र सिंह माल रहेका छन् ।

उनलाई शनिवार जिल्ला प्रहरी कार्यालय कैलालीको टोलीले धनगढी उपमहानगरपालिका–३, सहिद गेटबाट पक्राउ गरेको हो । जिल्ला अदालत कैलालीबाट सवारी ज्यान मुद्दामा उनलाई ३ वर्ष कैद सजाय र ३० हजार रुपैयाँ जरिवाना तोकेको थियो।

यस्तै, हाडनाता करणी मुद्दाकी फरार प्रतिवादी बैतडीको सिगास गाउँपालिका–९, बजाडकी २६ वर्षीया राजमती धामीलाई पनि प्रहरीले नियन्त्रणमा लिएको छ । 

उनलाई प्रहरी चौकी गाँजरीबाट खटिएको टोलीले घरबाटै पक्राउ गरेको प्रदेश प्रहरी कार्यालय धनगढीले जनाएको छ । जिल्ला अदालत बैतडीको फैसलाले हाडनाता करणी मुद्दामा उनलाई १ वर्ष कैद सजाय तोकेको थियो ।