सामाजिक सुरक्षा भत्ता र जेन–जी आन्दोलनको मारमा स्थानीय तह

२ करोड पनि छैन आन्तरिक आम्दानी

मेयरसाप डेस्क

काठमाडौं । कञ्चनपुरको कृष्णपुर नगरपालिकाका मेयर हेमराज ओझाले अहिले स्थानीय तहहरू जटिल आर्थिक मोडमा रहेको बताएका छन् ।

मौरीफाँटा खानेपानी उपभोक्ता तथा सरसफाइ समितिको कार्यक्रममा बोल्दै मेयर ओझाले बजेटको ठूलो हिस्सा सामाजिक सुरक्षा भत्ता र चालु खर्चमा जाने भएकाले विकास कार्यमा कठिनाइ आएको बताएका हुन् ।

मेयर ओझामा अनुसार, एक अर्बको बजेटमध्ये २५ करोड सामाजिक सुरक्षा भत्तामै खर्च हुन्छ । नगरपालिकाको आन्तरिक कर आम्दानी २ करोड पनि नपुग्ने र नदीजन्य पदार्थबाट हुने आम्दानीको ४० प्रतिशत प्रदेशले लैजाने गरेको उनी बताउँछन् ।

संघ र प्रदेशबाट आउने राजस्व बाँडफाँट र अनुदानको रकम नियमित नआएको उनको गुनासो छ । ओझाले जेनजी आन्दोलनका कारण राजस्व तिर्ने उद्योगहरूमा आगो लाग्दा कर सङ्कलनमा समस्या भएको र तलब दिन पनि कठिनाइ भएको बताए ।

जेनजी आन्दोलनमा जग्गा नाप जाँचको मेसिन र कागजपत्र जलेको तथा करिब २५ करोड रुपैयाँको बजेट समेत रोकिएको उनले बताए । सीमित स्रोतसाधनका बाबजुद शिक्षा, स्वास्थ्य र बाटो स्तरोन्नतिमा काम भइरहेको उनको भनाइ छ ।

मेयर ओझाले मौरीफाँटा खानेपानीलाई क्षमता विस्तार गर्न चाहेमा नगरपालिकाबाट पाइप उपलब्ध गराउने घोषणा गरेका छन् ।