सडक सञ्जाल जोडिएको ५ वर्षपछि मल्कवाङमा पुग्यो बस

मेयरसाप डेस्क

म्याग्दी । भौगोलिक रूपमा विकट म्याग्दीको धवलागिरि गाउँपालिका–५ मल्कवाङमा पहिलो पटक यात्रु बोकेर बस पुगेको छ । सडक सञ्जालमा जोडिएको पाँच वर्षपछि शनिवार ध१ख ३०८ नम्बरको बस सदरमुकाम बेनी बजारबाट मल्कवाङ पुगेको हो ।

बसका धनी जगत दगामी मगर र चालक श्याम मिजारलाई वडाध्यक्ष अमर छन्त्यालसहित जनप्रतिनिधि, अगुवा र स्थानीयले अबिर तथा माला लगाएर स्वागत गर्दै खुसीयाली मनाएका छन् ।

वडाध्यक्ष छन्त्यालका अनुसार, बस सेवा सञ्चालन भएपछि स्थानीयवासीले जिपको तुलनामा सस्तो भाडादरमा यात्रा गर्न पाएका छन् । पहिले जिपमा मल्कवाङ–बेनीको भाडा प्रतिव्यक्ति रु १,००० थियो । बसका लागि प्रतिव्यक्ति भाडादर रु ७५० कायम गरिएको छ ।

बस सेवा सञ्चालनबाट मल्कवाङ, भेडिखाल्डा, कुइने खानी, आरवाङ, घण्टीवाङका तीन सयभन्दा बढी परिवार लाभान्वित भएका छन् । म्याग्दी यातायात प्रालिले बेनीबाट हरेक बिहान ७ः०० बजे र मल्कवाङबाट बिहान ८ः०० बजे प्रत्येक दिन एक–एक वटा बस सञ्चालन गर्ने जनाएको छ । 

गाउँपालिकाले भेडिखाल्टालाई सडक सञ्जालमा जोड्न यस वर्ष रु ३० लाख विनियोजन गरेको छ । साथै, गण्डकी प्रदेश सरकारले लुरवाङबाट मल्कवाङ जोड्ने सडक स्तरोन्नतिका लागि बहु–वर्षीय योजना सञ्चालन गर्ने लक्ष्यसहित चालु आवमा रु १ करोड विनियोजन गरेको छ ।