कर्णाली याक्सले काठमान्डुलाई दियाे १५० रनको लक्ष्य

मेयरसाप डेस्क

काठमाडौं । सिद्धार्थ बैंक नेपाल प्रिमियर लिग (एनपीएल) अन्तर्गत आज कर्णाली याक्सले काठमान्डु गोर्खाजलाई जितका लागि १५० रनको लक्ष्य प्रस्तुत गरेको छ ।

कीर्तिपुरस्थित त्रिवि मैदानमा टस जितेर पहिले ब्याटिङ गरेको कर्णालीले निर्धारित २० ओभरमा ७ विकेट गुमाएर १४९ रन बनायो ।

कर्णालीका लागि अलराउन्डर गुल्सन झाले अन्तिममा उत्कृष्ट ब्याटिङ गर्दै मात्र २२ बलमा नटआउट ४९ रन बनाए । उनले ६ चौका र ३ छक्का प्रहार गरे ।

कर्णालीको सुरुवात खराब भए पनि मार्क वाटले ३० रन र पवन सर्राफले ३५ रन बनाउँदै तेस्रो विकेटका लागि ५८ रनको महत्त्वपूर्ण साझेदारी गरेका थिए ।

काठमान्डुका लागि मुख्य बलर रशिद खानले सर्वाधिक २ विकेट लिए । करण केसी, मिलिन्द कुमार र सन्तोष यादवले समान १–१ विकेट हात पारे ।

प्लेअफमा पुग्नका लागि पाँच खेलमा तीन जित निकालेको काठमान्डुका लागि आजको खेल जित्नै पर्ने दबाब छ, भने कर्णालीले पनि आफ्नो सम्भावना कायम राख्न जित हासिल गर्नैपर्ने अवस्था छ ।