हेटौँडा बजारमा सडक विस्तार मंसिर २० गतेदेखि सुरु हुने

दिक्षान्स खड्का

हेटौंडा । सडक डिभिजन कार्यालयले हेटौंडा बजार क्षेत्रमा सडक विस्तारको कार्य पूर्वनिर्धारित निर्णयअनुसार नै अघि बढाउने जनाएको छ ।

कार्यालय प्रमुख गुरुप्रसाद अधिकारीका अनुसार २०८० साल पुस १७ गतेको निर्णयलाई आधार मानेर कुनै पनि राजनीतिक दबाब वा प्रभावबिना योजना कार्यान्वयन गरिनेछ ।

वैकल्पिक मार्गहरूको निरीक्षण तथा अन्य आवश्यक तयारी पूरा भएपछि मंसिर २० गतेदेखि सडक विस्तारको काम औपचारिक रूपमा सुरु गरिने बताइएको छ ।

उनले केही स्थानमा सामान्य विवाद देखिए पनि व्यापारी र घरधनीहरूले आफ्ना संरचना तथा सामग्री हटाउने तयारी सुरु गरिसकेकोले स्थानीयहरूको सहयोग गर्ने प्रवृत्ति विस्तारै बढ्दो रहेको जानकारी दिए ।

प्रमुख अधिकारीले प्रेस सम्मेलनमार्फत जनताको सहयोगबिना विकास सम्भव नहुने उल्लेख गर्दै कामलाई सहज बनाइदिन आग्रह गरेका छन् ।