तिहारकै बीचमा एनपीएलको घम्साघम्सी, क्यानले सार्वजनिक गर्यो तेस्रो संस्करणको मिति

प्रत्येक टोलीमा विदेशी खेलाडी अनुबन्ध गर्न सुरु कस्ले उचाल्ला तेस्रो संस्करणको ट्रफि?

मेयरसाप डेस्क

नेपाल प्रिमियर लिग (एनपीएल) २०२६ को मिति सार्वजनिक भएको छ । नेपाल क्रिकेट संघ (क्यान) ले शनिबार बेलुका एनपीएलको तेस्रो संस्करणको मिति घोषणा गरेको हो ।

क्यानका सचिव पारस खड्काले प्रेस विज्ञप्तिमार्फत एनपीएलको तेस्रो संस्करण आगामी कात्तिक ९ गतेदेखि मंसिर ५ गतेसम्म सञ्चालन हुने जानकारी दिएका छन् । अर्थात्, एनपीएल २०२६ अक्टोबर २६ देखि नोभेम्बर २१ सम्म चल्नेछ । दशैंपछि सुुरु हुने एनपीएल तिहारका बेला पनि चलिरहकै हुनेछ । यसअघि एनपीएल तिहारपछि मंसिर महिनामा आयोजना हुँदै आएको थियो ।

क्यानले प्रतियोगिताको मिति घोषणा गरे पनि अहिलेसम्म खेल तालिका भने सार्वजनिक गरेको छैन । तिहारका दुई दिनबाहेक अन्य दिनमा खेल सञ्चालन गर्ने तयारी क्यानले गरिरहेको बताइएको छ ।

एनपीएलका लागि खेलाडी अक्सन यसअघि नै सम्पन्न भइसकेको छ । अहिले आठ ओटै फ्रेन्चाइज टोलीले विदेशी खेलाडी अनुबन्ध गर्ने क्रम समेत सुरु गरिसकेका छन् ।

यसअघि एनपीएल पहिलो संस्करणको उपाधि जनकपुर बोल्ट्स र दोस्रो संस्करणको उपाधि लुम्बिनी लायन्सले जितेको थियो ।