श्रृङ्खलाबद्ध ह*त्यामा संलग्न भएको आरोपमा चार जना युवा पक्राउ

मेयरसाप डेस्क

ओखलढुङ्गा । जिल्ला प्रहरी कार्यालयले श्रृङ्खलाबद्ध हत्यामा संलग्न भएको आरोपमा चार जना युवालाई पक्राउ गरी सार्वजनिक गरेको छ । 

गत असोजमा चार्खुमा भएको एकल महिलाको हत्या र यही महिना भदौरेमा भएको मगर दम्पत्तिको हत्याको आरोपमा प्रहरीले चिशङ्खुगढी गाउँपालिका–३, दियालेका २८ वर्षीय सङ्गम राई, सोई गाउँपालिका–४, रातमाटेका ३० वर्षीय विनोद राई, रातमाटेकै ३० वर्षीय प्रकाश भुजेल र सोइ गाउँपालिका–८, माम्खाका ३० वर्षीय अशोक भुजेललाई पक्राउ गरी आज सार्वजनिक गरेको हो ।  

सिद्धिचरण नगरपालिका–४, चार्खुकी ५२ वर्षीया एकल महिला रत्नकुमारी कटवालको गत असोज २६ गते राति घरमै हत्या गरिएको थियो । हत्यामा संलग्नहरु गरगहना र नगदसमेत लुटेर फरार भएका थिए । यसैगरी चिशङ्खुगढी–६, भदौरेमा यही पुस १५ गते किराना पसल सञ्चालन गर्दै आएका ६० वर्षीय शोभितमान थापा मगर र उनकी श्रीमती ६० वर्षीया रत्नमाया थापामगरको हत्या गरिएको थियो । उनीहरुको हत्या गरी रु एक लाख, सुनको गहना दुई तोला लुटपाट गरी हत्यारा फरार भएका थिए । 

नेपाल प्रहरीको केन्द्रीय अनुसन्धान ब्युरो, कोशी प्रदेश प्रहरी र जिल्ला प्रहरी कार्यालयको संयुक्त टोलीले हत्यामा संलग्नलाई पक्राउ गरेको हो ।