अमेरिकाद्वारा ७५ देशका नागरिकलाई आप्रवासी भिसामा रोक

मेयरसाप डेस्क

एजेन्सी । संयुक्त राज्य अमेरिकाले सार्वजनिक कल्याणकारी सुविधा र लाभको दुरुपयोग हुन सक्ने भन्दै ७५ वटा देशका नागरिकहरूलाई आप्रवासी भिसा जारी गर्न अस्थायी रोक लगाउने घोषणा गरेको छ ।

राष्ट्रपति डोनाल्ड ट्रम्पको आदेशमा अमेरिकी विदेश विभागले यो निर्णय सार्वजनिक गरेको हो, जसमा अमेरिका आउने आप्रवासीहरू आर्थिक रूपमा आत्मनिर्भर हुनुपर्ने र अमेरिकी करदाताहरूमाथि बोझ बन्न नहुने उल्लेख छ ।

आगामी जनवरी २१ देखि लागू हुने यो नयाँ व्यवस्थाले विशेष गरी ती देशहरूलाई लक्षित गरेको छ, जहाँबाट आउने नागरिकहरूले सरकारी सुविधा प्रयोग गर्ने उच्च जोखिम रहेको अमेरिकाको ठम्याइ छ ।

यस प्रतिबन्धको सूचीमा पाकिस्तान, अफगानिस्तान, बंगलादेश, इरान, नाइजेरिया र रुससहित ७५ राष्ट्रहरू परेका छन् । नयाँ निर्देशनअनुसार ती देशका नागरिकहरूले भिसा आवेदन पेस गर्न र अन्तर्वार्तामा सहभागी हुन पाए पनि रोकको अवधिभर कुनै पनि नयाँ आप्रवासी भिसा जारी गरिने छैन ।

यद्यपि, यो प्रतिबन्धले पहिले नै जारी भइसकेका भिसाहरू रद्द नगर्ने र पर्यटक तथा व्यापारिक भिसा जस्ता गैर–आप्रवासी भिसाहरूलाई कुनै असर नगर्ने विदेश विभागले प्रस्ट पारेको छ ।

सार्वजनिक शुल्क प्रावधान अन्तर्गत अधिकारीहरूलाई आवेदकको स्वास्थ्य, उमेर, अङ्ग्रेजी भाषाको ज्ञान र वित्तीय अवस्था मूल्याङ्कन गरेर मात्र भिसा निर्णय लिन निर्देशन दिइएको छ ।

ट्रम्प प्रशासनको यो कडा आप्रवासन नीतिका कारण अब ग्रिन कार्ड योग्यता र भिसा प्राप्ति प्रक्रिया थप चुनौतीपूर्ण बन्ने देखिएको छ ।