निर्वाचन आयोग अगाडि गगन र देउवा पक्षको नाराबाजी

मेयरसाप डेस्क

काठमाडौं । नेपाली कांग्रेसको आधिकारिकता विवादले उग्र रूप लिएपछि शुक्रबार निर्वाचन आयोग परिसर तनावग्रस्त बनेको छ ।

विशेष महाधिवेशनबाट निर्वाचित सभापति गगन थापा पक्ष र संस्थापन (देउवा) पक्षका कार्यकर्ताहरूले आयोगको मूल गेटबाहिर छुट्टाछुट्टै प्रदर्शन र नाराबाजी गरिरहेका छन् ।

आयोगको परिसरभित्र गगन पक्षका पदाधिकारीहरू धर्नामा बसेका छन् भने सडक खण्डमा देउवा पक्षले शक्ति प्रदर्शन गरिरहेको छ ।

दुवै पक्षबीच झडप हुन नदिन ठूलो सङ्ख्यामा सुरक्षाकर्मी परिचालन गरिएको छ र आयोगको मूल गेट पूर्ण रूपमा बन्द गरिएको छ । प्रदर्शनकारीको भीड बढ्दै गएपछि प्रहरीले स्थितिलाई नियन्त्रणमा लिन पानीको फोहोरासहितको टोलीलाई तयारी अवस्थामा राखेको छ ।

यसअघि, देउवा पक्षका कार्यवाहक सभापति पूर्णबहादुर खड्काले सानेपामा पत्रकार सम्मेलन गर्दै आयोगले आफूहरूलाई आधिकारिकता नदिए देशभर आन्दोलन गर्ने चेतावनी दिएका थिए ।

दुवै पक्षले आ–आफ्नो वैधानिकताको दाबी पेश गरे पनि आयोगले अहिलेसम्म कुनै आधिकारिक निर्णय सुनाएको छैन, जसका कारण कार्यकर्ताहरूमा आक्रोश बढ्दो छ ।